Stranica 7

Jo te učin

da budeš fin

gospodin,

kako se nosi kapelin

i darži bagulin,

a ti uvik po svoju,

sad ovako, sad onako,

pariš provi šjor Makako.

 

Eto, jeson von reko,

jeste je čuli

kako bruntulo

i jazikon bruštulo?

Kako ona hoće,

kako želi sin.

Još ćedu me učit

kako se nosi kapelin,

kada se darži bagulin.

Ne more se daje tako:

jo ovako,

a žena onako –

baš son provi šjor Makako!

 

Ko? Jo? Jo Makako?

E, nećemo tako!

Nećeš ti meni već bruntulat

i jazikom bruštulat.

Od sada, lipa moja Mande,

slušot ćeš moje komande!

Sve se ploćo, sve se vroćo.

Od sad će se znat

ko pije, a ko ploćo!

 

Oboj meni, ča to govorin?

Pari mi se da son pri reko

nego son ispeko.

Govorin kako jedon bambin,

kako da son rebambi.

Ufon u Boga da me žena ni čula.

Ma, ni me ni mogla čut

perke mi se sve ovo snilo,

ovo mi se somo pričinilo.

Ne pado mi na pamet

da jo počnen komandat

i guvernat,

perke bi žena počela

još veće bruntulat

i jazikon bruštulat,

 

 

 

 

 

i mogla bi me svega

kako gire samaštrat.

 

Šjor ši, to von je tako!

Misli jo ovako,

oli onako

ostajen uvik šjor Makako.

I neka je tako

i fola ti, Bože,

jerbo se ne more

iz svoje kože.

Ča je, to je,

bit će ča bude,

a bit će uvik tako-tako,

sad ovako, sad onako,

i boje je tako,

boje tarpit i mučat

nego komandat

i guvernat

pok se kontreštat,

pok se skonsumat,

pok ne moć spat.

Ko bi to mogo izdurat!

A za reć pravo,

more svit mislit

i ovako i onako

i da son provi šjor Makako,

ma ni baš sve tako.

Per fin,

kad nakrivim kapelin,

kad podignem bagulin

i jo komu god parin

jedon šesni gospodin

poštovoni šjor Martin!

Ča ni tako, šjor Makako?

 

 

                    Tin Kolumbić