Page Title

Stranica 4

Text Box: .SVE ISFARO ZA CETARDESET DON Pri dvi-tri generacije malo je ko u nos imo pinez za licit se. Pogotovo ako se tukalo licit u starosti. Pok ni ni cudo da se za covika od pedeset ili pedeset i pet godišć govorilo: stori ti i ti. Danas se kotorata lici kako ništa, a onda je vodila u slipilo. Fameja bi slipega oca ili dideta izvela pri kuću, sela na škanjel, da bar ćuti život, cuje razgovore i sl. Pasovali bi judi, pozdravili ga, a po koji susid, poprilici njegovih godišć, kadgod bi mu cini kumpaniju. Tako je jedon stori po Svetu Mikulu sedi pri kuću, a digod bi ga oboša likor Šoleti. Kako je u ovoj prilici bila ric obo baš storemu coviku, likor Šoleti je odluci dovest sa sobon don Stipeta, da ga kroz razgovor parićo za ispovid i pricest. Kad su došli diškorš je otprilike teka ovako: Likor Šoleti «Zdravi bili barba Onte» Barba Onte «I veseli, kad ste vi doture» Likor Šoleti:» «A ca mislite, koga son von dove?» Barbe Onte: «A biće onega pizdu od mojega susida...» Likor Šoleti: «A ni, dove son von don Stipeta.» Na to se barba Onte škužo don Stipetu. Da bi ga parićo za primit svete sakramente, don Stipe je barba Ontetu poce govorit kako je Bog do coviku uši da cuje, justa da i pije i govori, te oci da vidi. Eto u jednemu momentu ste izgubili vid ma Bog vidi svu vašu patnju. A ca je vaša patnja prema patnji njegovega sina, koju je podni za svih nos. Na to mu je barba Onta reka: «Fermojte don Stipe, jerbo ću von grubo reć. Isus je svoju muku isfaro za cetardeset don, a jo svoju dobota cetardeset godišć». I tako su likor Šoleti i don Stipe vajali bižat ća bez obavjenega posla.

Text Box: VODA NIKAD I SAD Barba Gorgo Hahon (akademik, prof. Grga Novak) doša doma na ferije, kako student, nindera okolo 1910. i nojde oca, barba Prošpeta, slabe voje. Pito ga barba Gorgo: «Ca je čaća, ca ste slabe voje? Ol ste maroti? Oli niste prodoli lonsko vino iz konobe?» Na to će mu otac: « Ma ni sinko ni jedno ni drugo, nego di ću bit dobro kad furešti perfin i guzicu peredu s vodon!» E, ma u ono doba su žene nosile vodu, u darvene verdice na glovu, iz fortice. Valiki su sritnici bili oni koji su imali dobru i velu gustirnu u kuću ili uz kuću. Altroke danas: tri- cetiri banje u kuću, sedan-osan rubinetih, a makina: pere, diškargoje i režentoje i to somo na jedon botun.

DOĆ ĆE DON

KAD ĆE BRODI OVIN KULFON NAVIGAT

I JUDI PARSTON

NA OVE NAŠE BONDE KOZAT

GOVOREĆ

OVODE JE NIKAD FOR BI

O vo su remije govorećega proroka Joškota Božanića, sa Komižon u zodnjemu stihu. Ovu je antologijsku pjesmicu napiso pri otprilike kvarat vika, misleć na svoju Komižu, koja sahne, vene i nestaje. More bit da je Komiža u to doba, za razliku od Fora, i meritala ovakovo proročanstvo, ma je ga For merito danas?

Prosudte somi!!!